ថៃ៖ ប្រធានរដ្ឋសភាកម្ពុជា សម្តេចពញាចក្រី ហេង សំរិន បានស្នើប្រធានរដ្ឋសភាថៃ លោក ឈួន លីកផៃ បន្តគាំទ្រ និងជំរុញលើកទឹកចិត្តឱ្យប្រជាជននៅតាមបណ្តោយព្រំដែនប្រទេសទាំងពីរ បន្តថែរក្សាមរតកប្រពៃណីល្អពីដូនតា ក្នុងការជួយយកអាសារគ្នា ជួយគ្នាក្នុងគ្រាអាសន្ន ការឈឺថ្កាត់ តម្រូវការសេវាសុខាភិបាលបន្ទាន់ រួមនិងការដោះដូរទំនិញបម្រើឱ្យជីវភាពប្រចាំថ្ងៃ ដើម្បីធ្វើយ៉ាងណាបង្កភាពងាយស្រួលទំាងសងខាង។

សម្តេចប្រធានរដ្ឋសភា បានស្នើទៅរដ្ឋសភាថៃបែបនេះនៅក្នុងឱកាសជួបពិភាក្សាការងារជាមួយ លោក ឈួន លីកផៃ ប្រធានរដ្ឋសភាថៃ និងជាប្រធាន APPF លើកទី៣០ នាព្រឹកថ្ងៃទី២៨ ខែតុលា ឆ្នាំ២០២២ នៅរដ្ឋសភាប្រទេសថៃ ខណៈសម្តេចចក្រីដឹកនាំគណៈប្រតិភូចូលរួមកិច្ចប្រជុំប្រចាំឆ្នាំ នៃវេទិកាសភាអាស៊ី-ប៉ាស៊ីហ្វិក ដែលសភាប្រទេសថៃធ្វើជាម្ចាស់។

ប្រធានរដ្ឋសភាថៃបានគំាទ្រចំពោះការលើកឡើងរបស់សម្តេចប្រធានរដ្ឋសភា។ លោក ឈួន លីកផៃ បានប្រាប់ដល់ប្រធានរដ្ឋសភាកម្ពុជាថា ក្នុងនាមប្រធានរដ្ឋសភាថៃ លោកតែងតែយកចិត្តទុកចំពោះទំនាក់ទំនងប្រទេសទំាងពីរ។ លោកបន្តថា នៅក្នុងអំឡុងពេលជំងឺកូវីដ-១៩ រដ្ឋសភាថៃបានស្នើដល់រដ្ឋបាលឱ្យយកចិត្តទុកដាក់ដល់ពលករបរទេសទំាងអស់ ដែលកំពុងធ្វើការនៅក្នុងប្រទេស ក្នុងនោះមានពលករកម្ពុជាផងដែរ។

ជាមួយគ្នានេះប្រធានរដ្ឋសភាថៃ ក៏បានជម្រាបសម្តេចចក្រីថា លោកនឹងដឹកគណៈប្រតិភូទៅចូលរួមកិច្ចប្រជុំទល់មុខរវាងអាស៊ាន និង AIPA និងមហាសន្និបាត AIPA លើកទី៤៣ នៅកម្ពុជាក្នុងខែវិច្ឆិកាខាងមុខនេះ។

សម្តេចពញាចក្រី និងលោក ឈួន លីកផៃ បានបង្ហាញក្តីរីករាយ ចំពោះសមិទ្ធផលទាំងឡាយ ដែលប្រសូត្រចេញពីកិច្ចសហប្រតិបត្តិការដ៏ល្អរវាងរដ្ឋាភិបាល នៃប្រទេសទំាងពីរ កម្ពុជា-ថៃ ក៏ដូចជារវាងរដ្ឋសភាទាំងពីរ ដែលបានផ្តល់ផលប្រយោជន៍ឱ្យគ្នាទៅវិញទៅមក ដើម្បីវឌ្ឍនភាព និងវិបុលភាព សម្រាប់ប្រជាជាតិទំាងសងខាង និងបានរួមចំណែកដល់ការថែរក្សាសុខសន្តិភាព ស្ថិរភាព និងការអភិវឌ្ឍ ទំាងក្នុងតំបន់ និងសកលលោកផងដែរ។

គូសបញ្ជាក់ថា ប្រធានរដ្ឋសភាកម្ពុជា សម្តេចពញាចក្រី ហេង សំរិន កំពុងដឹកនាំគណៈប្រតិភូជាន់ខ្ពស់សភាកម្ពុជាទៅចូលរួមកិច្ចប្រជុំប្រចាំឆ្នាំនៃវេទិកាសភាអាស៊ី-ប៉ាស៊ីហ្វិកលើកទី៣០ (APPF-30) នៅប្រទេសថៃរយៈពេល៤ថ្ងៃចាប់ពីថ្ងៃទី២៦-២៩ ខែតុលា ឆ្នាំ២០២២៕